Íslenski Ættfræðivefurinn

Frá fornu fari hefur ættfræðin verið þjóðaríþrótt og vinsæl dægrastytting Íslendinga og sagt hefur verið að ættfræðin sé móðir sagnfræðinnar. Hvað sem um það má segja er ljóst að ættfræði skipar veigamikinn sess í merkum fornbókmenntum okkar enda skipti sköpum í þeim fjölmörgu og oft langvinnu erfðadeilum sem hér voru háðar á ýmsum tímum að kunna glögg skil á þeim fræðum og þá ekki síður að vera "vel ættaður".
Nú til dags eru allir jafn vel ættaðir, sem betur fer (þótt sumir séu - að eigin mati - betur ættaðir en aðrir) og opinberlega ber lítið á erfðadeilum en áhuginn er alltaf jafn mikill á að vita sem mest um sem flesta, svo sem fjölskrúðug flóra ættfræðirita ber með sér.

Markmið

Þessi síða er ætluð Netverjum, sem áhuga hafa á ættfræði. Hér má koma á framfæri spurningum ýmis konar, svörum við spurningum og ekki hvað síst hugleiðingum um ættfræði, ættfræðirannsóknir og birtingu þeirra. Vissulega væri gaman að sjá eitthvað slíkt. Svo má auðvitað kynna hér hinar sívinsælu ættarsamkomur, sem haldnar eru vítt og breitt um landið - vetur, sumar, vor og haust.
Lítið inn í Fundarsalinn, þar er alltaf eitthvað að gerast. Verið með og skráið það sem þið viljið koma á framfæri. Aldrei að vita nema þið fáið þar einhverja úrlausn eða aðstoð.

Gagnagrunnur

Ýmsan hátt hafa menn á því að koma ættfræðinni á Netið og nú er ég loksins búinn að finna það form sem mér líkar. Var reyndar búinn að því fyrir löngu en sá ekki hvernig ég kæmi gögnunum á Netið fyrr en nýlega. Þeir sem kæra sig um að sjá hvernig þetta lítur út geta það með því að smella í tengilinn hér til hliðar. Reyndar er það svo að grunnurinn er læstur svo að ekkert er hægt að skoða nema með sérstöku aðgangsorði.

mailto:halfdanh@simnet.is